आमा बिनाको घर

ओथारो गुँड ओत आश्रयथलो हो एक किल्ला घर
आमा हुन् यसकी कमाण्डर रथी सर्वोच्च उन्नायक
जस्तो चन्द्र बिना उजाड र फिका देखिन्छ नीलो नभ
त्यस्तै भग्न उजाड खण्डहर हो आमा बिनाको घर

आमा भन्नु दया क्षमा र करुणा साक्षात हुन् देवता
आमा व्योम निहारिका र जलधी ब्रम्हाण्डकी बन्दिता
आमा स्कूल कलेज या मदरसा हुन् विश्व विद्यालय
शोभाहीन उजाडिदो बगर हो आमा बिनाको घर

पाए सन्ततिले पुग्यो अरु कुनै हुन्नन् निजी चाहना
खाए सन्ततिले छ तृप्त मन त्यो छैनन् कुनै तिर्सना
यो उत्सर्ग विचित्रको अरु कुनै सम्बन्धमा हुन्छ र ?
संज्ञाहीन र प्राणहीन पुतला आमा बिनाको घर

आमाको मन हाँस्छ हर्षित बनी हाँसे भने सन्तति
आमाको मन रुन्छ व्याकुल बनी रोए भने सन्तति
यस्तो प्राञ्जल प्रेम यो जगतमा खोजी कहाँ मिल्छ र
बास्नाहीन विरङ्ग पुष्पदल हो आमा बिनाको घर

आमा तीर्थ र चारधाम सब हुन् गुम्बा तथा मन्दिर
आमा आदि अनादि सुक्ष्म स्थूल या धर्ती तथा अम्बर
आमाको मनझैं बिराट जगमा अर्को कुरा के छ र
आभाहीन खगोल शून्य नभ हो आमा बिनाको घर

आमा बेद कुरान बाइवल या हुन् शास्त्रमा भाग्वत
आमा ख्रिष्ट यिशू तथा भगवती अल्लाह या इश्वर
आमा दृष्टि र चेतना जगतकी आमा धरा उर्बर
यौटा मन्दिर हो बिना गजुरको आमा बिनाको घर

• रुद्र ज्ञवाली (भैरहवा )